Eman blues

طارق لما قرر يتجوز الهام جري يقدم علي شغل تاني
وبعدها راح يدخل الجمعيه اللي طول عمره بيرفض يدخلها
وراح يدور علي شقه يأجرها
و تيجى واحدة تقولك بيحبنى و بحبه بس ظروفه مش جاهزة .. اقولها يا حبيبتى لو بيحبك هيعدل ظروفه و جواباته و حياته و حكاياته عشان يبقى جاهز و نص و تلات اربع .. اتوكسي بلا وكسه ❤️

لما نتكلم عن جورج أشرف، فأنا شايفة رحلة كبيرة جدًا انا لحقت اشوفها أيام مسرح الجامعة، من كلية العلوم جامعة القاهرة.
هناك عمل أدوار جميلة جدًا، وحصد بسببها على جوائز مهمة، منها جائزة أفضل ممثل أكتر من مرة وقبل ما الناس تعرفه على الشاشة، كان بقاله سنين طويلة شغال ومجتهد كممثل مسرحي.
السنين دي كلها بدأت تثمر و هتشوفوه في مسلسل "Underage"، زى ما شفناه كمان في مسلسل "يا ورد على فل وياسمين" عامل دور لطيف وخفيف جدًا.
وكمان من فترة مسرحية اسمها "أداجيو"، عمل فيها شخصية "شعبان"، الراجل البسيط الغلبان اللي بيشتغل في توصيل الطلبات، واللي تقريبًا بيساعد البطل اللى عمله استاذ رامى الطمبارى
ولحد دلوقتي مش قادره أنسى المونولوج اللي بيحكي فيه عن وفاة الست اللي بيحبها، زوجته، وعن الفراشة اللي كانت بتظهر قبل وفاتها.
بجد كان من أجمل المشاهد اللي شفتها الفترة الأخيرة و اللمعة اللي كانت في عينه، والإحساس الصادق اللي وصله للجمهور، كانوا كفيلين يخلوك تتاثر بكل كلمة بيقولها.
مشهد مليان صدق وبساطة وإنسانية.
برافو يا جورج، وربنا يوفقك يا رب، ونشوفك من عمل لعمل أقوى وأجمل، لأنك فعلًا ممثل يستحق كل النجاح اللي جاي.

في يوم من الأيام، الفنان أحمد عبد الوهاب كان في مركز الإبداع، وجاله خبر إن مخرج مهم جدًا ومشهور جدًا جاي يختار ممثلين لإعلان كبير فى رمضان .
و بعد الاختيارات، لقى اسمه متكتب جنبه كلمة "Hero". طبعًا فرح جدًا، وافتكر إنه بطل الإعلان اللي هينزل في رمضان وهيكسر الدنيا و رجع لمامته يحكيلها، فقالت له:
"ما تقولش لحد، أحسن نتحسد و إحنا هنعزم خيلانك كلهم في رمضان يفطروا معانا ويتفرجوا عليك ."
و راح أحمد يوم التصوير الساعة 7 الصبح في معهد السينما، فاتفاجئ بطابور طويل جدًا من الممثلين جايين من فنون مسرحية وكل شوية واحد ينادي على الأسماء: ده يدخل وده ما يدخلش.
لما وصل لاسمه قال له: "أحمد عبد الوهاب؟" قال: "أيوه." رد عليه: "اه الهيرو."
فدخل وهو فرحان جدًا ومبسوط بنفسه، وكل شوية يقول لنفسه : " الهيرو... الهيرو."
دخل الكرفان، عمل الميكاب، وقعد مستني و الساعة بقت 5 المغرب و لسه قاعد .
وفي الآخر قالوا: "يلا على التصوير."
دخل لقى فيه خمسة ممثلين كمان، فقال لنفسه: "ماشي، هم خمسة بس... إنما أنا الهيرو."
وفجأة لقى المخرج بيهمس لمساعد المخرج ويشاور عليه.
راح له مساعد المخرج وقال: "لو سمحت اقعد على جنب شوية ."
وقعد على جنب.
والإعلان كله اتصور وهو قاعد على جنب!
بعد ما خلص، راح يسأل: "طب وأنا؟ فين مشاهدي؟"
فالموضوع اتقفل، وكل اللي قاله المخرج : "هيقبض... هيقبض."
وقعدوا يلموا المعدات وهو مش فاهم إيه اللي حصل.
دي واحدة من أسوأ لحظات خيبة الأمل لأي فنان أو أي حد نفسه يمثل.
لكن الجميل في الحكاية إن أحمد عبد الوهاب ما استسلمش و ما بطلش يحاول، وما فقدش إيمانه بنفسه و بياخد الموقف بضحك من غير أزمة!
ويمكن عشان كده النهارده الناس بتحب موهوبته و خفة دمه، ده غير كمان انه كاتب شاطر جدًا، وكوميديان تلقائي وخفيف.
والسنة دي في مسلسل "يا ورد على فل وياسمين"، شفنا قد إيه الناس متعلقة بيه، وقد إيه حضوره وتلقائيته عاملين فرق حقيقي في العمل.
بجد كل الشكر لكل فنان فضل يحاول ويكمل رغم الإحباطات، لحد ما جه اليوم اللي الناس شافته وقدرت موهبته.

للمرة المليون..
أجمل حاجة إننا نتفرج على مسلسل أحداثه حقيقية جدًا، زي مسلسل "يا ورد على فل وياسمين".
المسلسل بعيد عن الفيلل والقصور والعالم اللي أغلبنا عمره ما شافه، وراجع تاني للناس العادية اللي بنقابلها كل يوم.
البطل نفسه ياخد منحة برّه مصر، ابن أسرة متوسطة، والبطلة بنت من أسرة فقيرة و كادحة و شغالة كوافيرة، وبتحب تعمل خير وبتعمل ميك أب لعرائس يتامى لوجه الله رغم ظروفها الصعبة.
أكتر حاجة شدتني هي واقعية التفاصيل و الشوارع هى شوارعنا، والمواصلات هي المواصلات اللي بنركبها كل يوم، ميكروباصات وأوتوبيسات وزحمة وحياة حقيقية من غير تجميل زيادة مالوش لازمة.
تحس إن الكاميرا نازلة وسط الناس فعلًا، مش بتتفرج على عالم صناعى.
كمان الثنائية بين أحمد عبد الوهاب وصبا مبارك ناجحة جدًا. مفيش رومانسية مبالغ فيها ، و المشاعر بسيطة وصادقة، شبه قصص كتير بنشوفها حوالينا كل يوم و الاتنين عاملين حالة فيها دفء وتلقائية خلت العلاقة بينهم مقنعة ومحبوبة.
والأجمل إن المسلسل نازل أوف سيزون، بعيد عن دوشة وزحمة الأعمال الرمضانية، فمقدرش أقول غير بجد شوفوه و روقوا على نفسكم ..
و لكاست العمل برافووووو 👏❤️

كلنا بنفتكر دلوقتى الصحفي اللى سأل زلاتان ابراهيموفيتش في مؤتمر عن رأيه في مونديال قطر والتنظيم فكان رد زلاتان كده:
خيالي بامتياز .. كان كأس عالم رائع
كنت أنا وعائلتي هناك لمدة يومين
التنظيم 10/10
الخبرة والاحترافية 10/10
التنظيم 10/10
الجماهير 10/10
الأكل 10/10
والمواصلات 10/10
كل شيء كان ممتاز 10/10
هل كنت تريد جواب آخر ؟؟ 😂😃
الراجل قاله بس حقوق الإنسان...
رد عليه 10/10 و هو بيلعب حواجبه 😃

انس بوخش لما سأل كاظم الساهر وقاله
"لخّص طفولتك في 3 كلمات"
رد كاظم:
"ما أقدر أقولك طفولة... لكن أقولك حرمان!
إحنا كنا نسوي لعبنا بأنفسنا. كنت أمشي في الشوارع وأدور على الوايرات، وأروح للوساخة والمزابل أدور .. لو لقيت وايرات أجمعها وأسوي منها سيارة، وأفتخر لما يقولوا: واو... وأفرح لأنها من صناعتي.
طفولة صعبة... لكن لما كبرت أدّتني الشيء العظيم. . فنقول حرمان احترامًا للوالد والوالدة.
الفقر مهما يكون، لما تشوف جارك وتشوف كيف عايشين، تبدأ الأسئلة: ليش إحنا عايشين في هالبيوت؟
فكان في حرمان... بس كان في سعادة. لما تنتمي لعائلة وتضحك."
كاظم عاش طفولة كلها حرمان، لكن لما وصل للشهرة عمره ما أنكر أصله، بالعكس ده فخور بيه والأجمل إن الحرمان ما حرموش من الأدب ولا التواضع، وفضل محتفظ بإنسانيته ورُقيّه مهما كبر ونجح. ❤️

قبل ما الدنيا كلها تعرف شاكيرا النجمة العالمية اللي إحنا متابعينها النهارده، كان فيه فصل هادي جدًا ومؤثر في حياتها محدش يعرف عنه .
الفصل ده كان فيه شاب اسمه أوسكار أويوا، واللي ناس كتير بيقولوا إنه أول حب حقيقي في حياة شاكيرا.
بس القصة دي ما كانتش حب مراهقة ولا مغامرة ولا نزوة ، لأ، دي كانت جزء مهم من السنين اللي شاكيرا عاشتها و كبرتها
وقتها كانت لسه بنت صغيرة من مدينة أسمها بارانكيا بتحاول تبدأ طريقها علشان تبقى فنانة.
أوسكار كان معاها في الأيام الصعبة، لما قررت تعزل وتروح مدينة أكبر أسمها بوغوتا علشان تبدأ من هناك.
وقتها ما كانش فيه لا شهرة، ولا حفلات، ولا جمهور بيهتف باسمها و لا حد يعرفها أصلا …
كان فيه بروفات مبتنتهيش و شغل عمال على بطال ، وأحلام كبيرة جدًا، واحتياج لحد يصدق فى موهبتها و يشجعها و هى لسه مش واثقه فى نفسها و لا واثقه انها أد أحلامها.
بس أوسكار كان الشخص ده
كان جمبها فى الاستوديوهات و المشواير و بيشجعها و معاها فى نجاحها خطوة بخطوة ، وبيشاركها أيامها اللي مليانة تعب و أرهاق وأمل
وقتها الطريق لسه ما كانش باين فيه أي مجد أو نجاح .
ومن العلاقة دي، اتولدت واحدة من أشهر وأجمل أغانيها: "Anthology".
الأغنية دي في الحقيقة بتحكي قصة حب علمتها كتير، قصة الحب خلّت منها أغنية خلدت إحساسها و إحساس جيل كامل.
وبعد سنين طويلة، أوسكار اتكلم وقال: "أنا اللى قررت أسيبها علشان هى بقت نجمة و مكنتش عايز أبقى عائق في طريقها الفني خلاص .. وكان عندي حق، هي فعلا وصلت للسماء .."
القصة بينهم خلصت، بس الكلمة دي فضلت مش مفهومة .. و هو ايه اللى حصل خلاه يشوف نفسه عائق فى طريق نجاحها ؟؟؟.
على الرغم إنه كان فصل أساسي جدًا فى حياتها ، لأنه كان البداية اللي طلعت منها شاكيرا اللي العالم كله بيحبها النهارده.

ربع ثقتها فى نفسها و هى بتكلم عن مرتبها 😃

فى لقاء القيصر كاظم الساهر مع أنس بوخش قال كلام صادم و حقيقي اوى :
"نحن الرجال ندمر أكبر أمرأة... احنا بطبيعتنا وطبيعة أخلاقنا الالتزام عندنا آخر شيء، والمرأة وين واحنا وين لا تقدر تقارن... تقارن.
واقعنا إننا غير ملتزمين. مع احترامي للرجال، يزعلون ما يزعلون، خلوهم يزعلون... أكلم عن الواقع.."
و حكى ازاى والده اتجوز على امه اربعه و كلهم سابهم فى الاخر وباس على رجل والدته أدام عيالها كلهم و قالهم إنها اتحملت و شافت كتير !!
اللى يلفت النظر هنا درجة الصدق والشفافية اللى بيتكلم بيها كاظم .. ده حتى ما حاولش يبرر، ولا يدافع، ولا يخفف من قسوة الواقع اللى عاشه وشافه بعينه بالعكس، اختار إنه يحكيه زى ما هو.
واضح إنه وصل لمرحلة كبيرة من التصالح مع نفسه ومع ماضيه، لدرجة إنه بقى يقدر يعترف بحاجات ممكن ناس كتير تتحرج تتكلم عنها أو تحاول تبررها وده نوع نادر من الصراحة، لأن الإنسان غالبًا بيحب يظهر أحسن مظهر و لو كذب ، لكن كاظم كان بيتكلم بمنتهى الوضوح عن تجربة شكلت نظرته للحياة والعلاقات.
سواء اتفقنا أو اختلفنا مع رأيه، صعب ما نلاحظش إنه كان بيتكلم بقدر كبير من الصدق مع النفس، ومن غير حسابات كتير لشكل الكلام أو ردود الأفعال، وده يمكن واحد من الأسباب اللى خلت كلامه يوصل للناس ويلمسهم بالشكل ده.

لما تتفرج على مسرحية "زائد واحد"، مش هتبطل ضحك على اللى عامله أحمد عباس جمباز … و اللي بيقدم دور "حمو" و اللى هو عيل لسه فى بطن أمه 😃
أحمد بيسموه جمباز و انا بشوفه ممثل رايق جدا و تلقائي فى تفاصيله وكل بروفة و يوم عرض تلاقي عنده حاجة جديدة و بسيطة ممكن ما تتلاحظش، لكن في الآخر تلاقيك قدام حاله تمثيلية مختلفة جدا .
إنسان شغله هادي وسلس، من غير توتر ولا دوشة… ومن غير كلام كتير بيشدك.
هيفوتك كتير لو ما شفتوش…
آخر يوم للعرض الأحد القادم على المسرح الهناجر ❤️