IndayAnn vlogs

DE LIMA, PINAHINTO NI ESCUDERO SA IMPEACHMENT TRIAL

Sinita ni Impeachment Presiding Officer at Senate President Chiz Escudero si House prosecutor Leila de Lima matapos itong maghayag ng mga pahayag na, ayon sa kanya, ay tumutukoy na sa mga konklusyon ng kaso sa impeachment trial ni Vice President Sara Duterte.

Sa gitna ng pagdinig, pinaalalahanan ni Escudero ang prosekusyon na iwasang magbigay ng mga pahayag na tila humahatol na sa usapin.

“Kindly avoid conclusions of fact and law,” ani Escudero.

Bago ito, sinabi ni De Lima na ang isyu ay hindi lamang umano tungkol sa isang nawawalang resibo o accounting error, kundi sa pattern ng paggamit ng ₱612.5 milyong confidential funds.

Agad namang tumutol ang defense panel sa pangunguna ni Atty. Michael Poa, na iginiit na ang mga alegasyon ay dapat mapatunayan sa pamamagitan ng mga testigo at mga ebidensyang ihaharap sa paglilitis.

ERWIN TULFO: 'HINDI NA AKO NAGULAT' SA PAGBANGGIT NI PBBM KAY ROMUALDEZ SA SONA

Sinabi ni Senador Erwin Tulfo na hindi na siya nagulat nang banggitin ni Pangulong Ferdinand "Bongbong" Marcos Jr. sa kanyang SONA ang nalalapit na paghahain ng kaso laban sa dating House Speaker Martin Romualdez kaugnay ng umano'y flood control scandal.

Ayon kay Tulfo, matagal na umano niyang naririnig na hindi naging masaya ang Pangulo nang madawit ang kanyang pinsan sa isyu.

“Naririnig-rinig ko na he's not happy na na-involve 'yung pinsan niya, si Speaker Romualdez... I'm not surprised kasi I've been hearing already na the President was disappointed last year pa lang,” ani Tulfo.

Sinabi rin ng senador na magpapatuloy ang imbestigasyon ng Senate Blue Ribbon Committee hindi lamang sa flood control projects kundi maging sa mga farm-to-market roads at iba pang umano'y ghost projects.

“Kung meron ho kayong alam na may mga involved na politiko sa flood control, sa farm-to-market road, sa mga ghost projects, please contact us dito po sa Blue Ribbon. Submit your pieces of evidence at ihe-hearing po natin,” panawagan niya.

Dagdag pa ni Tulfo, naniniwala siyang inaasahan ng publiko na may mga mataas na opisyal na mapanagot.

“Ang pinaka-inaantay ng mga kababayan natin, may makasuhan na mataas na opisyal,” aniya.