Glow mirale

صفحتي مارانيش دايرتها باش نقعد نروج لمنتجاتي و كفى ...
في اي فرصة تكون عندي باش نتكلم على موضوع مهما كان سواءا نفسي ،نصيحة ،معلومة في الصحة العامة ...الخ منبخلش باذن الله
هذو اليومين نقعد شوية و نلقى روحي في عالم آخر نقول سبحان الله صحيح رانا كلنا جنائز تتمشى و كلنا على بعد ثانية فقط من الموت و ملك الموت ينتظر قبض أرواحنا ...
على هذي دعائنا دائما (ان يأمر الله بقبض أرواحنا إلا و هو راض عنا)
لنا موعد مع نهايتنا في اي لحظة ...ممكن درك راكي تغسلي في الاواني مراحش تكمليهم ...ممكن راكي تغتابي في شخص متكمليش كلامك ...راكي ناوية غدا على برنامج معين مراحش يكون ...راكي مزعفة ولا زعفانة من كاش شخص تروحي بدون ما تصفا القلوب 💔
موت الفجأة يخليك تعاود حسابك في بزاااف أمور و الحمد لله انو ربي مزال مخلي في قلوبنا هذي البذرة ...مزلنا نخافو من الموت مهما فعلنا و عملنا (لانو ولا شخص يقدر يعرف عاقبته و اذا كان صح اعمالو تُقبلت او لا ....اذا واش دار في حياتو يشفعلو !!...اذا رانا في الطريق الصحيح لارضاء الخالق ...هذي لي علاش لازم ديما نقعدو خايفين من الموت و كيف سنقابل رب العرس العظيم

و كيفاش تكون خاتمتنا لاننا سنبعث على تلك الحالة...
الحمد لله و هذا فضل منه مزال عندنا ضمير حي ...
لانو بزاف ناس راحتلهم هذي النعمة و الموت لي أصعب شي ميأثرش فيهم و عليهم (قلوبهم ماتت)

الشئ لي مذابيا نفهموه انو منتعلقوش بالدنيا و اصحابها (التعلق الوحيد يكون بالله وحده )
و مالازمش تستصغرو اي عمل سواءا مليح او العكس
تقدري ديري الخير بابسط شي ...تقدري تبعدي الاذى بكلمة واحدة و قادرة تغيري منكر متترديش
اي شئ اي شئ اي شئ مهما كان و مهما بانلك صغير (متقوليش يحاااي هذا وين يبان مع واش دار فلان و علان)
نفس الشي مع السيئات و المنكر ...
نذكر نفسي أولا و نذكركم (الدعاء ثم الدعاء حتى و إن مكنتيش على استقامة و ناقصة في عباداتك ...ديما ادعوا الثبات و ان يرضى عنا الله و إن يوفقنا للخير و يصرف عنا الشر 💚 لانو كلنا نغلطو بصح لازم نداركو

صدقوني ولا شي رانا نديرو فيه لانو حنا وحدنا قادرين و حنا واعرين و حنا مدينين و حنا و حنا
لالا كل شي بتوفيق من الله ...هذيك الصلاة لي راكي تنوضي ليها أولا توفيقه عز و جل متقدريلهاش
هذاك الخير لي راكي تسعايلو لولا تسخير الله نفس الشي حاجة مراح تقدري تغيريها
و الجنة دخولها يكون برحمة الله لانو مهما درنا اعمال مراحش نلحقو نوفيو حق المعبود
صحابة و انبياء و كانو يخافو من دخول النار ...
بزاااف كلام حابة نلحقولكم ...لكن أحيانا يخونك التعبير لذلك نتمنى دائما انو الانسان يعتبر ماشي يوم و يومين و بعدها يرجع نفس الشخص او اسوء ....العبرة ناخذوها و تقعد ديما مرافقتنا

ممكن أول مرة يصرالي و يجيني هذا الشعور ...
لي انا بنفسي معرفتوش و مفهمتوش ...
نسمع يوميا بموت فلان سواءا من الاقارب او حتى عبر مواقع التواصل الاجتماعي و ما علينا إلا الصبر و الاحتساب
(إنا لله و إنا إليه راجعون )
البارحة كالعادة كي يكون عندي شوية وقت ندخل نتصفح مواقع التواصل الاجتماعي و اذا بي نلقى عشرات المنشورات تتحدث عن موت إحدى الاخوات ...
صدقوني من عادتي اترحم بيني و بين نفسي و أمر ...
هذي المرة لا كما اسلفت الذكر جاني شعور اني ندخل لصفحة المرحومة و اذا بي ....
جبال من الحسنات باذن الله (الأخت حسابها كلو للخير و في خدمة اليتامى و بعض الحالات )
قاعدة نتأمل و نقول سبحان الله ممكن انا و غيري كثيرات مكناش نعرفوها لكن موتها عرفنا بيها و خلانا نترحمو عليها
(باذن الله عندها سر)
على قدر حزني عليها و على احبابها الذين تركتهم ورائها ...على قدر فرحتي بذاك الاثر العظيم الذي خلفته
(اللهم اجعلها من اهل الفردوس الاعلى مع النبي الصديق)
الموت صعبة و فراق الاحبة أصعب لكن هذي حال الدنيا ...كل من عليها فان و يبقى وجه ربك ذو الجلال و الاكرام
على المؤمن أن يجعلها عبرة
على ما أظن اني مقدرتش نعبر كما ينبغي ....لكن 💔

من العادات اليومية الجميلة التي اصبحت امارسها هي مشروب الكاكاو 💚👇
كاين بزاف لي يعرفو مدى اهمية مسحوق الكاكاو للصحة العامة ...
بطبيعة الحال لأنه مصدر طبيعي و قوي للبوليفينولات اهمها
(،Epicatechin،وCatechin،Proanthocyanidins)
ناهيك عن تأثيره في توسع الأولية الدموية و اداء القلب ✅
بسبب اكسيد النتريك
بلا ما ننساو تحسن في الدورة الدموية (و هنا رايحين نهدرو على البشرة )كيما علابالكم كل ما د تحسنت الدورة الدموية تتحسن بشرتكم
و بما انو اختصاصنا هو التجميل رايحة نقلكم انو مفيد جدا لتقوية و مرونة البشرة ✅
دارو دراسات على فئات مختلفة لمدة معينة (يشربو يوميا الكاكاو) لاحظو انو التجاعيد بدات في الاختفاء و في العصور القديمة كانو يعتمدوه كمصدر لتقوية بشرتهم و انو عندو دور في بعض المسارات المرتبطة بالكولاجين لانو غني بمضادات الاكسدة 💯✅✅
و بما انو قلنا غني بالبوليفينولات يعني رايحة يحميك بطريقة او باخرى من الإجهاد التأكسدي و تلف الخلايا ...يعني عند تعرضك لاشعة فوق بنفسجية مراحش تتضرر بشرتك مثل اخريات و عدة فوائد أخرى ....
الشئ لي نبه عليه هو لازم تعرفو تفرقو بين الكاكاو المحلى و بين المعالح و بين الطبيعي و الخام (تفاداو المحلى و المعالح
كيفاش نستعملوه؟!
من ملعقة إلى ملعقتين كبار (تقدرو تخلطوه مع حليب و شوية قرفة و فاميليا كيما تقدرو تستغناو عليهم )
تعملوه سموثي ...تقدرو تخلطوه مع شوفان و ياوورت طبيعي ايضا
نشربوه من الاحسن صباحا لانو يعتبر من المنبهات✅💚

توضيح
عزيزاتي ممكن شهر اكتوبر باذن الله نعاود نفتح الطلبيات ...
حبيت نعلمكم باش ديرو حسابكم لانو كما قلت رايحة ننتقل إلى مختبر اوسع و أكبر و الأعمال مازالت متواصلة و عالاغلب رايحة طول شوية ...
لذلك خممت و اذا اضطريت نشد عدد معين نخدمو في المختبر القديم لحين الاستعداد التام بالحلة الجديدة 💚✅
الأمر أخذ و سيأخذ وقت أكثر مما توقعنا خاصة مع الافكار الجديدة التي نود تطبيقها (المكملات الغذائية،خلية الاستماع و المتابعة ...الخ )
أي جديد رايحة نعلمكم عبر ستوري و منشور عن الموعد بالتحديد (ممكن نفتح مرة أو مرتين فقط و بعدها نعاود ندي وقت مستقطع )

من فضلكم حطولي صفحات يبيعو ألبسة شرعية ذات جودة و نوعية...
شكرا مسبقا 💚

قالولي توحشنا منشوراتك مراكيش تباني...
السبب 👇
لقيت زوجي جابلي 30 كغ من الفلفل الحلو البارح جوزت نهاري معاه
و معول على الحار 😅
قولولي كيفاش تخدموه !؟
كاين لي تفورو و كاين لي طيبو عادي يا درا !

مزالكم قاعدين ؟!
حبيت نعرف وقت الخوف او الصدمة كيفاش تكون ردة فعلكم ؟!

ليست كل فكرة تُرفض لأنها خاطئة..بعضها تصل إلى أماكن لم يعتد الناس النظر إليها💚
في البداية تظن أن الأمر مجرد مشاركة أفكار، محتوى، نقاشات وتواصل… ثم مع الوقت تفهم أنك لن تستطيع إرضاء الجميع..وأنك حتى لو حاولت أن تكون حذرا، ستجد نفسك أحيانا في مواقف لم تكن تتوقعها
لا يمكنك أن تواكب كل شيء، ولا أن تتحدث في كل موضوع..ولا أن تكون حاضرا في كل مناسبة...

ومع كل خطوة نحو انتشار أكبر، تكبر معها أشياء أخرى الاهتمام بك، التوقعات منك، التدخل في تفاصيلك، كثرة الآراء، وأحيانا ردود أفعال قاسية لمجرد أنك طرحت موضوع لا يتفق معه البعض...و الأمرّ انك ممكن تواجه من يكرهك و يحرض عليك بدون سبب
وهنا تبدأ تفهم أن الشهرة ليست مجرد أرقام ومتابعين
كلما زاد ظهورك يعني زادت المساحة التي يأخذها هذا العالم من حياتك و شخصيتك
تبدأ تفكر في الموضوع قبل أن تطرحه، ثم في طريقة طرحه، ثم في ردود الفعل، ثم في التعليقات، ثم في النقاشات… وحتى في أبسط التفاصيل تصبح طاقتك الفكرية مستهلكة دون أن تشعر....
والأصعب أنك قد تجد نفسك تعيش بعض لحظات حياتك بعقل منشغل بما ستنشره، بدل أن تعيشها كما هي...
وبالنسبة للمرأة تحديدا أحيانا تكون المعادلة أكثر تعقيدا خاصة إذا خاضت في سوق القيل و القال و الاصطدامات💚 في المقابل هناك بيت، عائلة، مسؤوليات، مساحة وراحة تحتاج أن تحافظ عليها
وأي توسع زائد في هذا العالم قد يأخذ شيئا من هذه المساحة، حتى لو كان الأمر في ظاهره مجرد محتوى💚
لهذا أنا شخصيا أصبحت أكثر اقتناعا بأن الإنسان لا يحتاج دائما إلى أن يكون حاضرا أكثر حتى يكون مؤثرا
لانو حقيقة نشوفو إلتهام للذات
الوسطية و شد العصى من منتصفها بالنسبة لي هو الافضل لا إفراط و لا تفريط ✅

و على الشخص أن يراجع افكاره و نفسه دائما حتى لا يقع في دوامة حب الظهور لمجرد رفع الارقام 💚
و يبقى هذا رأيي و نظرتي التي لا ألزم بها أحد ...

نصائح من الاحسن تبعيها و اخطاء تجنبيها لبشرة صحية 💚✅👇
_شرب الماء بكمية كافية خلال النهار
_تجنبي السكريات و الدهون بصفة متكررة
_حاولي تبعي نظام غذائي سليم
_الابتعاد عن التوتر قدر الامكان
_غسل الوجه بالماء او غسول لطيف
_حاولي الابتعاد عن الصابون الصلب (او استعمليه مرة في الأسبوع فقط اذا اضطريتي)
_ابتعدي عن المقشرات ال الخشنة
_اىتقشير يكون لطيف دون حك او فرك
_تجنبي الخلطات المنزلية غير مدروسة(خل،بيكربونات،قارص،قهوة،ملح...الخ)
_تجنبي عصر الحبوب و لمسهم باستمرار
_لا تهملي الترطيب حتى للبشرة الدهنية لانو الجفاف يسبب التجاعيد
_اي مادة فعالة ندخلوها بالتدريج للروتين و ليس بتركيز عالي خاصة لما يكون فيه الريتينويدات و الأحماض،
_راقبي تفاعل بشرتك مع المنتجات (استعملي على منطقة صغيرة و شوفي ردة الفعل اذا كان احمرار و حكة دام اكثر من ساعتين معناه تحبسي ،اذا حكة خفيفة و مطولتش و متعاودتش عادي)
_متقارنيش فعالية المنتج و نتائجه مع بشرة أخرى (أحيانا بشرة في اسبوع تتحسن و أخرى نحتاج لشهر )
_من الاحسن متخلطيش بين الروتين لي فيه منتجات طبيعية و أخرى كيميائية مصنعة
_اذا كان عندك مشاكل مستعصية استشري طبيب الجلد و من الاحسن يبحثلك عن الاسباب قبل التوجه للعلاج لتفادي بعض الأدوية
_خلي روتينك بسيط بدون تعقيدات و سيرومات كثيرة (مرطب ،سيروم تغذية،ماء ورد يكفي)
_لا تهملي نظافة المنشفة الخاصة بالوجه (تتغير يوميا لانو تصرف بسيط يمكن يديرلك مشاكل كثيرة)
_تفادي بخار الماء عند التنظيف (منشفة في ماء دافئ و تحطيها على بشرتك أفضل بكثير)
_حبسي مستحضرات التجميل إلا للضرورة لانو الاستعمال اليومي و المتكرر يسبب مشاكل خارجية و داخلية على المدى البعيد
في الاخير البشرة الصحية ماشي معناه متخرجلك حتى حبة او عيب ...انما يكون حاجز الجلد ديالك سليم و محمي ماشي اي شئ يأثر عليه خاصة الالتهابات المتكررة ✅💚

واش هو المنتج او مستحضر او آلة ،آلية،اي شئ تتمناو مستقبلا يكون كاين للتخلص من مشكل ما ؟!
اي شئ خطر ببالكم شاركوني افكاركم العبقرية !