Mvg Cvn Kalari Kottayam

*_🪔🪔🪔🪔🪔🪔🪔🪔🪔🪔_*

*ഇന്ന് ഗുരുപൂർണ്ണിമ*
___________________________

" ഗുരുര്‍ ബ്രഹ്മാ ഗുരുർ വിഷ്ണു
ഗുരുര്‍ ദേവോ മഹേശ്വര:
ഗുരു സാക്ഷാത് പരബ്രഹ്മ
തസ്മൈ ശ്രീ ഗുരവേ നമ: "

ഹിന്ദു പഞ്ചാംഗമനുസരിച്ചു ശകവർഷത്തിൽ ആഷാഢമാസത്തിലെ ശുക്ല പൗർണ്ണമിയുടെ അന്ന് ഗുരുപൂർണ്ണിമ ഭക്തിനിർഭരമായി ആചരിക്കുന്നു.

ആത്യന്തികമായി പറഞ്ഞാൽ നമ്മുടെയെല്ലാം അമ്മതന്നെയായിരിക്കും ആദ്യഗുരു.പക്ഷേ കൂടുതൽ അറിവ് നേടുവാൻ ഒരു ഗുരുവിന്റെ സാമീപ്യം നമുക്ക് ആവശ്യമാണ്.

ഹിന്ദുക്കൾ പുരാതനഹിന്ദു കാലഘട്ടത്തിലെ പ്രധാന ഗുരുക്കന്മാരിലൊരാളായ ഭഗവാൻ ശ്രീ വേദവ്യാസമഹർഷിയെ അനുസ്മരിച്ചാണ് ഈ ദിവസം കൊണ്ടാടുന്നത്. അതുകൊണ്ട് ഈ ദിവസം വ്യാസപൂർണ്ണിമ എന്നും അറിയപ്പെടുന്നു. അദ്ദേഹത്തിന്റെ ജന്മദിനത്തിനോടൊപ്പം ഈ ദിവസമാണ് ബ്രഹ്മസൂത്രം എഴുതിത്തീർത്തത് എന്നും വിശ്വസിക്കപ്പെടുന്നു. ഗുരുക്കന്മാരുടെ ഗുരുവാണ് അദ്ദേഹം .

'ഗു' എന്നാൽ അന്ധകാരമെന്നും 'രു' എന്നാൽ അതിനെ നിരോധിക്കുന്നത് എന്നുമാണ് അര്‍ത്ഥം. അതിനാല്‍ അന്ധകാരത്തെ - അജ്ഞാനത്തെ - നിരോധിക്കുന്നവന്‍ എന്ന അര്‍ത്ഥത്തില്‍ ഗുരു ശബ്ദം പറയപ്പെടുന്നു.കൂടാതെ ഗുരു എന്ന പദത്തിന് ധര്‍മ്മാദികളെ ഉപദേശിക്കുന്നവന്‍, ജ്ഞാനി എന്നും അര്‍ത്ഥങ്ങളുണ്ട്.

ദ്വാപരയുഗത്തിന്‍റെ അവസാനം മഹാവിഷ്ണു വ്യാസമുനിയായി അവതരിച്ച് വേദത്തെ വിഭജിച്ചതായാണ് ഐതിഹ്യം പറയുന്നത്. ആദ്യവേദം നാലു പാദങ്ങളുള്ളതും നൂറായിരം ഗ്രന്ഥങ്ങള്‍ ഉള്ളതുമായിരുന്നു. അതിനെ വ്യാസന്‍ ഋഗ്വേദമെന്നും യജൂര്‍വേദമെന്നും സാമവേദമെന്നും അഥര്‍വ്വവേദമെന്നും നാലായി വ്യസിച്ചു- അഥവാ വിഭജിച്ചു. ദ്വാപരയുഗത്തില്‍ കൃഷ്ണദ്വൈപായനനന്‍ എന്നപേരില്‍ പിറന്ന മുനി ഇപ്രകാരം ചെയ്തതുകൊണ്ടാണ് "വേദവ്യാസനായി' അറിയപ്പെടുന്നത്.

ഇദ്ദേഹം ഭാരതത്തിന്‍റെ പുരാണ ഇതിഹാസങ്ങളിലൊന്നായ മഹാഭാരതത്തിന്‍റെ കര്‍ത്താവാണ്.18 പര്‍വ്വത്തില്‍ 2000ത്തില്‍ അധികം അധ്യായങ്ങളുള്ള . ഒന്നേകാല്‍ ലക്ഷം ശ്ലോകങ്ങളുള്ള വ്യാസ മഹാഭാരതത്തില്‍ പരാമര്‍ശിച്ചിട്ടില്ലാത്ത ഒന്നുംഈ ലോകത്തില്‍ ഉണ്ടായിട്ടില്ല, ഉണ്ടാവുകയുമില്ല എന്നാണ് വിശ്വാസം.

വ്യാസന്‍ എന്നാല്‍ വ്യസിക്കുന്നവന്‍ പകുക്കുന്നവന്‍, വിഭജിക്കുന്നവന്‍ എന്നെല്ലാമാണ് അര്‍ഥം.ഓരോ ദ്വാപരയുഗത്തിലും വേദത്തെ നാലായി വിഭജിച്ച ഇരുപത്തെട്ട് വ്യാസന്മാര്‍ കഴിഞ്ഞുപോയതായി പുരാണങ്ങളില്‍ പരമാര്‍ശിക്കുന്നു.

ഭാരതീയമായ ശാസ്ത്രഗ്രന്ഥങ്ങള്‍ പറയുന്നത് സകല ഉപനിഷത്തുകളിലും വിളങ്ങുന്നത് ഗുരുവിന്റെ പാദകമലങ്ങള്‍ തന്നെയാണ് എന്നാണ്. അതായത് ഈശ്വരന്റെ പ്രത്യക്ഷ സ്വരൂപമായാണ് ഓരോ ഭക്തനും ശിഷ്യഗണങ്ങളും തങ്ങളും ഗുരുവിനെ കാണുന്നത്. ഈശ്വരനും ഗുരുവും മൂര്‍ത്തഭേദമില്ലാത്തതായും ശാസ്ത്രം പറയുന്നു.

ഇന്നത്തെ ശാസ്ത്രയുഗത്തില്‍ തിരക്കുപിടിച്ച ജീവിതത്തില്‍ ഒരു ഗുരുവിന്റെ ആവശ്യകത തിരിച്ചറിയാത്ത സമൂഹത്തിലാണ് നാം ജീവിക്കുന്നത്. സമൂഹത്തില്‍ ധര്‍മ്മവും സനാതനമൂല്യങ്ങളും നഷ്ടമായിരിക്കുന്നു. യഥാര്‍ത്ഥത്തില്‍ ഗുരു നമ്മെ നയിക്കുന്നത് ജീവിതത്തിന്റെ പരിപൂര്‍ണ്ണതയിലേയ്ക്കാണ്. നന്മയിലേയ്ക്കാണ്. ഈശ്വര സാക്ഷാത്കാരത്തിലേക്കാണ്.

"അജ്ഞാന തിമിരാന്ധസ്യ
ജ്ഞാനാഞ്ജന ശലാകയാ
ചക്ഷുരുന്മീലിതം യേന
തസ്മൈ ശ്രീഗുരവേ നമ"

അജ്ഞാനമാകുന്ന തിമിരത്തെ ഇല്ലാതാക്കാൻ ജ്ഞാനമാകുന്ന അഞ്ജനം കൊണ്ടെഴുതി കണ്ണുകൾ തുറപ്പിക്കുന്ന ഗുരുവിനായി നമസ്കാരം എന്ന് പറഞ്ഞ ഭാരതം ഗുരുവിന്റെ മഹത്വത്തെ അത്രയധികം വിലമതിച്ചിരുന്നു.

ഓരോ ഗുരു പൂർണിമയും നമുക്ക് തിരിച്ചറിവുകളുടേത് ആകേണ്ടതുണ്ട്.
_*ജ്ഞാനം* നമ്മിലുണ്ടാക്കിയ പരിവർത്തനത്തെ നാം നിരീക്ഷിക്കണം, ജ്ഞാനമില്ലായിരുന്നെങ്കിൽ നാം എവിടെയും എത്തുകയില്ലായിരുന്നു എന്ന് ഓരോ നിമിഷത്തിലും തിരിച്ചറിയേണ്ടതുണ്ട്......,_
_കാലാകാലങ്ങളായി ഈ ജ്ഞാനം കാത്തുസൂക്ഷിച്ച്‌ നമുക്കെത്തിച്ചുതരുന്ന ഗുരുപരമ്പരയോട് കൃതജ്ഞതയുള്ളവരാകുക; ഇത് വളരെ പ്രധാനമാണ്........,_

*_പിതൃത്വം,മാതൃത്വം എന്നിവപോലെ ഗുരുത്വവുമുണ്ട്........,_*

_നമുക്കെല്ലാവർക്കും ആരുടെയെങ്കിലും ഗുരുവാകാതിരിക്കാൻ പറ്റുകയില്ല.......,_

_എന്തായാലും അത് അറിഞ്ഞോ അറിയാതെയോ നാം ആരുടെയൊക്കെയോ ഗുരുവാണ്........,_

_ഗുരുത്വത്തിൽ ജീവിക്കുക എന്നത്‌ ജീവിതവിജയത്തിന് ആവശ്യമാണ്.......,_

_നമ്മളും ഈശ്വരനും ഗുരുത്വവും തമ്മിൽ ഒരു വ്യത്യാസവുമില്ലെന്ന് അറിയുക......._

*_ഗുരുപൂർണ്ണിമ ആശംസകൾ.....🪔_*

പ്രിയരേ..
Covid-19ന്റെ നിയന്ത്രണങ്ങൾ കാരണം കഴിഞ്ഞ കുറെ മാസങ്ങളായി നമ്മുടെ കളരി അടച്ചിട്ടിരിക്കുകയായിരുന്നെല്ലോ. ഇപ്പോൾ നിയന്ത്രണങ്ങളോടെ വീണ്ടും തുറക്കുവാനുള്ള അനുവാദം കിട്ടിയിട്ടുണ്ട്.

ശുചീകരണങ്ങൾക്കു ശേഷം കളരി തിങ്കളാഴ്ച മുതൽ തുറന്നു പ്രവർത്തിക്കുന്നതായിരിക്കുമെന്ന് ഇതിനാൽ അറിയിച്ചു കൊള്ളുന്നു.15 വയസ്സിനു മുകളിൽ ഉള്ളവർക്ക് മാത്രമാണ് പരിശീലനം ഉണ്ടായിരിക്കുന്നത്.

Covid-19ന്റെ വ്യാപനം കണക്കിലെടുത്തു നിയന്ത്രണങ്ങളോടെ മാത്രമേ കളരി പ്രവർത്തിക്കാൻ സാധിക്കുകയുള്ളു.സഹകരിക്കുക.