Better Life Health Care - Hikkaduwa

📛 කුඩා දරුවන් අතර පැතිරෙන " #අත්_පා_සහ_මුඛ_රෝගය" (Hand, Foot, and Mouth Disease) සහ දෙමව්පියන් නොදන්නා එහි පසුකාලීන සංකූලතා!

​මේ දවස්වල පාසල් යන සහ පෙරපාසල් යන වයසේ පසුවන කුඩා දරුවන් අතර "අත්, පා සහ මුඛ රෝගය" (HFMD) වේගයෙන් පැතිර යන බවක් දක්නට ලැබෙනවා.
මෙය වෛරස් (Coxsackievirus) ආසාදනයක් නිසා ඇතිවන, ඉතා පහසුවෙන් එක් දරුවෙකුගෙන් තවත් දරුවෙකුට බෝවිය හැකි රෝගී තත්ත්වයක්.

​බොහෝ විට මෙය බයානක රෝගයක් නොවන අතර සතියකින් හෝ දින 10කින් ඉබේම සුවය ලබනවා. නමුත් දරුවාගේ අපහසුතාවය අවම කිරීමට, අනෙක් දරුවන්ට බෝවීම වැළැක්වීමට සහ රෝගයෙන් පසු ඇතිවන සමහර සංකූලතා හමුවේ අනවශ්‍ය ලෙස බිය නොවීමට අප මේ ගැන නිවැරදිව දැනුවත් විය යුතුයි.

​🚨 ප්‍රධාන රෝග ලක්ෂණ මොනවාද?
​උණ සහ උගුරේ කැක්කුම: රෝගයේ මුල්ම ලක්ෂණය ලෙස දරුවාට මඳ උණක් හෝ තද උණක් ඇතිවිය හැකියි.

​මුඛයේ බිබිලි (Mouth Sores): දිව, විදුරුමස් සහ කම්මුල් ඇතුළත රතු පාට කුඩා බිබිලි ඇති වී, පසුව ඒවා කුඩා තුවාල (ulcers) බවට පත් වෙනවා. මේ නිසා දරුවාට කෑම බීම ගිලීමට අපහසු වන අතර කෙළ වැගිරීම ද සිදුවිය හැකියි.
​අත් සහ පාවල බිබිලි (Skin Rash): අත්ල, යටි පතුල් සහ සමහර විට තට්ටම් (buttocks) ආශ්‍රිතව කැසීමක් නොමැති, රතු පැහැති කුඩා බිබිලි හෝ වතුර පිරුණු බිබිලි මතු වේ.

​⚠️ දෙමව්පියන් අතිශයින්ම කලබලයට පත් කරන පසුකාලීන සංකූලතාව: නියපොතු ගැලවී යාම (Nail Shedding / Onychomadesis)

​HFMD රෝගය වැළඳී සුව වී, සති 4ක් - 8ක් පමණ ගත වූ පසු සමහර දරුවන්ගේ අත්වල හෝ පාවල නියපොතු මුලින්ම ගැලවී යාමේ හෝ පොතු හැලීමේ තත්ත්වයක් දැකිය හැකියි. මෙය දැකීමෙන් බොහෝ දෙමව්පියන් දැඩි ලෙස කලබලයට සහ බියට පත් වෙනවා.
​මීට හේතුව කුමක්ද? රෝගය උත්සන්න වූ අවස්ථාවේදී ඇතිවන තද උණ සහ බිබිලි නිසා නියපොතු වර්ධනය වන මූලය (Nail matrix) තාවකාලිකව අක්‍රීය වීමයි.

​බිය විය යුතුද? නැත! මෙය සම්පූර්ණයෙන්ම තාවකාලික තත්ත්වයක් වන අතර, කිසිදු වේදනාවකින් තොරව සිදුවන්නක්. සති කිහිපයක් ඇතුළත දරුවාට නැවතත් ඉතා සෞඛ්‍ය සම්පන්න අලුත් නියපොතු ස්වභාවිකවම වැවෙනවා. මේ සඳහා විශේෂ ඖෂධීය ප්‍රතිකාර අවශ්‍ය වන්නේ නැහැ.

​🛡️ දරුවා රැකබලා ගන්නේ කෙසේද?

​දියර වර්ග වැඩිපුර ලබා දෙන්න: කටේ තුවාල නිසා දරුවා කෑම ප්‍රතික්ෂේප කරන්න පුළුවන්. විජලනය (Dehydration) වැළැක්වීම සඳහා මඳ උණුසුම් වතුර, නැවුම් පළතුරු යුෂ (ඇඹුල් නොවන), සුප් හෝ කැඳ වර්ග නිතර නිතර තේ හැන්දෙන් හෝ කෝප්පයෙන් පොවන්න.
​සුවපහසු ආහාර: රළු, උණුසුම්, සැර හෝ ඇඹුල් අධික ආහාර ලබාදීමෙන් වළකින්න. ගිලීමට පහසු, සිසිල් සහ මෘදු ආහාර (උදා: අයිස්ක්‍රීම්, යෝගට්, නිවුණු කැඳ) ලබාදීම සුදුසුයි.

​වෛද්‍ය උපදෙස් මත පමණක් ඖෂධ දෙන්න: උණ සහ වේදනාව පාලනයට වෛද්‍යවරයා නිර්දේශ කරන මාත්‍රාවට අනුව පමණක් පැරසිටමෝල් (Paracetamol) ලබා දෙන්න.

කිසිවිටකත් වෛද්‍ය උපදෙස් නොමැතිව ඇස්පිරින් (Aspirin) හෝ වෙනත් වේදනා නාශක ලබා නොදෙන්න.

​🚫 රෝගය පැතිරීම වළක්වන්නේ කෙසේද?

​රෝග ලක්ෂණ පවතින දරුවන් සුව වන තුරු පාසල්, පෙරපාසල් හෝ දිවා සුරැකුම් මධ්‍යස්ථාන වෙත යැවීමෙන් වළකින්න.

​දරුවා ඇල්ලීමෙන් පසු, වැසිකිළි භාවිතයෙන් පසු සහ දරුවාගේ බිබිලි පිරිසිදු කිරීමෙන් පසු සබන් යොදා දෑත් හොඳින් සෝදන්න.
​දරුවා නිතර අල්ලන සෙල්ලම් බඩු, පිඟන්, කෝප්ප සහ පොදු ස්ථාන විෂබීජ නාශක යොදා නිතර පිරිසිදු කරන්න.

​💡 විශේෂ වෛද්‍ය උපදෙස්: දරුවා ප්‍රමාණවත් ලෙස දියර වර්ග පානය නොකරන්නේ නම්, අධික නිදිමත ගතියක් හෝ අප්‍රාණික බවක් පෙන්වන්නේ නම්, වහාම සුදුසුකම් ලත් වෛද්‍යවරයකු වෙත දරුවා යොමු කරන්න.
​නොබියව, නිවැරදි සෞඛ්‍ය පුරුදු අනුගමනය කරමින් ඔබේ දරුවා ආරක්ෂා කරගන්න!

Dr. Shanaka Kalupahane
​
​

"ලොවට සාමය බෙදූ උතුම් වෙසක් පුන් පොහෝ දිනයක් වේවා! ඔබ සැමට නිරෝගී සුවය ප්‍රාර්ථනා කරමු."

" #මගේ_දුවට_ඇයි_මේ_පෙති?" – මව්වරුන්ගේ බියට වෛද්‍ය විද්‍යාත්මක පිළිතුර

​අවිවාහක දියණියකගේ අක්‍රමවත් ඔසප් වීම පාලනය කිරීමට වෛද්‍යවරයෙකු "උපත් පාලන පෙති" (Combined Oral Contraceptive Pills) නිර්දේශ කළ විට බොහෝ මව්වරුන් කලබලයට පත්වීම සාමාන්‍ය දෙයක්.

​නමුත් මෙහි සැබෑ වෛද්‍ය විද්‍යාත්මක හේතුව ඔබ දන්නවාද?

​📍 ඇයි අක්‍රමවත් ඔසප් වීම සිදු වන්නේ?

කාන්තාවකගේ මාසික චක්‍රය පාලනය කරන්නේ ඊස්ට්‍රජන් සහ ප්‍රොජෙස්ටරෝන් යන හෝර්මෝන මගිනුයි. විශේෂයෙන් තරුණ වියේදී (වයස අවුරුදු 15-18):

​හෝර්මෝන සමබරතාවය තවමත් නිසි ලෙස ගොඩනැගී නොතිබීම.
​ඩිම්බ කෝෂ වලින් ඩිම්බයක් නිකුත් වීම (Ovulation) ප්‍රමාද වීම.
​PCOS වැනි තත්ත්වයන් නිසා හෝර්මෝන ක්‍රියාකාරීත්වය අවුල් වීම.

​📍 "උපත් පාලන පෙති" මෙහිදී කරන්නේ කුමක්ද?

මෙම පෙති හුදෙක් උපත් පාලනයට පමණක් නොව, 'හෝර්මෝන ප්‍රතිස්ථාපන ප්‍රතිකාරයක්' ලෙස වෛද්‍ය විද්‍යාවේදී භාවිතා කරයි.
​හෝර්මෝන සමබර කිරීම: සිරුරට අවශ්‍ය හෝර්මෝන නිසි ප්‍රමාණයෙන් ලබා දී ඔසප් චක්‍රය ක්‍රමවත් කරයි.

​ගර්භාෂය ආරක්ෂා කිරීම: මාස ගණනාවක් ඔසප් නොවී තිබීමෙන් ගර්භාෂ බිත්තිය අනවශ්‍ය ලෙස ඝන වීම වැළැක්වීමට මෙය උපකාරී වේ.

​අම්මලා දැනගත යුතුම සත්‍යය! ✅

​ඔබේ දියණියට මෙම පෙති නිර්දේශ කළේ ඇයගේ හෝර්මෝන පද්ධතිය නිසි මඟට ගැනීමට මිස වෙනත් හේතුවකට නොවන බව වටහා ගැනීම වැදගත්.

​💡 ා_ගන්න:

​අනාගත දරු සම්පත්: මෙම පෙති භාවිතය නිසා දියණියකගේ අනාගත දරු සම්පත් වලට කිසිදු බලපෑමක් ඇති නොවන බව විද්‍යාත්මකව තහවුරු කර ඇත.

​අතුරු ප්‍රතිලාභ: අක්‍රමවත් ඔසප් වීම නිසා ඇතිවන අධික වේදනාව, කුරුලෑ සහ අනවශ්‍ය රෝම වර්ධනය පාලනය කිරීමටත් මෙය විශාල රුකුලක් වේ.

​නතර කිරීම: වෛද්‍ය උපදෙස් මත නියමිත කාලය අවසානයේ මෙය නතර කළ පසු සිරුරේ ස්වභාවික හෝර්මෝන ක්‍රියාවලිය සාමාන්‍ය පරිදි සිදුවේ.

​බිය නොවන්න, ඔබේ දියණියගේ සෞඛ්‍යය පිළිබඳව වෛද්‍යවරයා සමඟ විවෘතව සාකච්ඡා කරන්න.

Dr. Shanaka Kalupahane
​
​

#බටන්_බැටරි: ඔබේ දරුවාගේ ජීවිතය විනාඩි කිහිපයකින් උදුරාගත හැකි #නිහඬ_මාරයා! ⚠️🔋

​සෙල්ලම් බඩු, රිමෝට් සහ අත් ඔරලෝසු වල ඇති කුඩා "බටන් බැටරි" දරුවෙකු ගිල දැමුවහොත් එය හුස්ම හිරවීමටත් වඩා භයානක රසායනික පිළිස්සීමක් ඇති කරයි.

⛔​මොකක්ද මේකේ තියෙන භයානකකම? 🔥

​බැටරිය ආහාර නාලයේ රැඳුණු සැණින්, ඒ හරහා ගලා යන විදුලි ධාරාව ශරීරයේ දියර සමඟ ප්‍රතික්‍රියා කර කොස්ටික් සෝඩා නිපදවයි.

​පැය 2ක් ඇතුළත: පටක දියවී යාම ආරම්භ වේ.
​ප්‍රධාන ලේ නාල සිදුරු වීම: බැටරිය නිසා ආහාර නාලය සහ ප්‍රධාන රුධිර නාල (Aorta) අතර සිදුරු ඇති වී දරුණු රුධිර වහනයක් සිදුවිය හැක.

⛔​දිගුකාලීන බලපෑම්: බැටරිය ඉවත් කළත්, සති කිහිපයක් යනතුරු අභ්‍යන්තර සිදුරු ඇතිවීමේ අවදානම පවතී.

⛔​දරුවා බැටරියක් ගිල ඇති බව හඳුනා ගන්නේ කොහොමද? 🤔

​සමහර විට දරුවා ගිලිනවා ඔබ නොදකින්නට පුළුවන්. මේ ලක්ෂණ ගැන විමසිලිමත් වන්න:

​කෙළ වැගිරීම සහ ගිලීමේ අපහසුව.

​වමනය හෝ නොසන්සුන් බව.

⛔​බරපතල ලක්ෂණ: වමනය සමඟ ලේ පිටවීම හෝ මලපහ කළු පැහැයට පිටවීම.
​කැස්ස, කටහඬ ගොරෝසු වීම හෝ පපුවේ වේදනාව.

❗​දෙමාපියන් කළ යුතු සහ නොකළ යුතු දේ (ප්‍රථමාධාර) ✅🚫

#වහාම_කළ_යුතු_දේ:

​රෝහලට රැගෙන යන්න: කිසිදු රෝග ලක්ෂණයක් එනතෙක් බල නොසිට වහාම දරුවා රෝහලට රැගෙන යන්න.

​මී පැණි ලබා දෙන්න (වයස අවුරුදු 1ට වැඩි දරුවන්ට පමණි): රෝහලට යන අතරතුර සෑම විනාඩි 10කට වරක් මී පැණි තේ හැඳි 2ක් ලබා දීමෙන් රසායනික හානිය යම් තාක් දුරකට අවම කළ හැක.

#නොකළ_යුතු_දේ:

​වමනය කරවන්න එපා: මෙය තත්ත්වය තවත් දරුණු කළ හැකියි.
​වෛද්‍ය උපදෙස් රහිතව කිසිදු ඖෂධයක් ලබා නොදෙන්න.

⛔​දරුවා ආරක්ෂා කර ගන්නේ කොහොමද? 🛡️

​බැටරි දමන පියන ස්කුරුප්පු (Screws) යොදා තද කළ හැකි උපකරණ පමණක් දරුවන්ට ලබා දෙන්න.

​භාවිතා කර ඉවත් කළ බැටරි පවා දරුවන්ට හසු නොවන සේ ආරක්ෂිතව බැහැර කරන්න.
​අමතර බැටරි දරුවන්ට ළඟා විය නොහැකි උසකින් තබන්න.

​මතක තබා ගන්න: මෙහිදී සෑම තත්පරයක්ම ඉතා වටිනවා! දරුවා බැටරියක් ගිල දැමූ බවට සැක නම් වහාම වෛද්‍ය සහාය පතන්න. 🏥🏃‍♂️

Dr. Shanaka Kalupahane.

​

#දෙවන_කොටස "ඇඟිලි කරු කුණු වීම" (Athlet’sFoot)

මෙය බෝවන්නේ කොහොමද? 🚿

මෙය ඉතා ඉක්මනින් බෝවන රෝගයකි:
​පොදු නාන කාමර සහ පිහිනුම් තටාක අවට හිස් පතුලෙන් ඇවිදීමෙන්.
​ආසාදිත අයෙකුගේ සපත්තු, මේස් හෝ තුවා හුවමාරු කර ගැනීමෙන්.

​රෝගය වළක්වා ගන්නේ සහ ප්‍රතිකාර කරන්නේ කොහොමද?

​පාදයේ දිලීර ආසාදනවලින් බේරෙමු! 🩴☀️

​මෙම රෝගයෙන් මිදීමට ඇති හොඳම විසඳුම වන්නේ පාද වියළිව තබා ගැනීමයි.

​ප්‍රතිකාර සහ ආරක්ෂිත පියවර:

​පාද වියළිව තබන්න: ස්නානයෙන් පසු ඇඟිලි කරු අතර ප්‍රදේශය පිරිසිදු රෙදි කඩකින් හොඳින් පිසදා වියළා ගන්න.

​නිවැරදි පාවහන්: නිවසේදී හැකි සෑම විටම පාවහන් රහිතව සිටින්න. රෙදි හෝ සමෙන් නිපදවූ වාතාශ්‍රය ලැබෙන පාවහන් පළඳින්න.

​මේස් පිරිසිදුව තබා ගන්න: දිනපතා පිරිසිදු, කපු (Cotton) මේස් භාවිතා කරන්න.

​දිලීර නාශක ආලේපන: වෛද්‍ය උපදෙස් මත Antifungal ක්‍රීම් වර්ග හෝ පවුඩර් වර්ග භාවිතා කළ හැකියි.

රෝග ලක්ෂණ අඩු වුවත්, වෛද්‍යවරයා නියම කළ කාලය පුරාම ඖෂධය පාවිච්චි කිරීම අනිවාර්යයි.

​වෛද්‍යවරයකු හමුවිය යුත්තේ කවදාද? 💊

​ප්‍රතිකාර කළත් සුව නොවේ නම්.

​පාදයේ තුවාල වලින් සැරව ගලන්නේ නම් හෝ අධික ලෙස ඉදිමෙන්නේ නම්.

​ඔබ දියවැඩියා රෝගියෙකු නම්, මෙවැනි ආසාදනයක් දුටු සැණින් වෛද්‍ය උපදෙස් ලබාගන්න.

​සටහන: මෙය සාමාන්‍ය දැනුවත් කිරීමක් පමණි. රෝගී තත්ත්වයක් පවතී නම් සුදුසුකම් ලත් වෛද්‍යවරයකු හමුවන්න.

වෛද්‍ය ශානක කළුපහන.

​

#පළමු_කොටස

​"ඇඟිලි කරු කුණු වීම" (Athlet’sFoot) කියන්නේ මොකක්ද?

​ඇඟිලි කරු කුණු වීම නැතිනම් "Tinea pedis" කියන්නේ කුමක්ද? 🦶

​සමහරුන්ට පාදවල, විශේෂයෙන්ම ඇඟිලි අතර හම සුදු පැහැ වී, තුවාල වී හෝ කොරපොතු වගේ ගැලවී යනවා ඔබ දැක ඇති. අපි සාමාන්‍ය ව්‍යවහාරයේදී මෙයට "ඇඟිලි කරු කුණු වීම" යැයි පවසනවා. මෙය Dermatophytes නම් දිලීර වර්ගයක් නිසා ඇතිවන බෝවන රෝගයකි.

​මෙය වැළඳෙන්නේ කොහොමද? 👟

දිලීර වර්ධනය වීමට වැඩිපුරම කැමති තෙතමනය සහ උණුසුම ඇති පරිසරයටයි.
​ඔබේ පාද නිතරම දහඩියෙන් තෙත්ව පවතී නම්.
​ප්‍රමිතියෙන් තොර, තද වැසුණු පාවහන් (Boots/Sports shoes) දවස පුරා පැළඳ සිටී නම්.
​වැඩ කරන ස්ථානවල නිතරම ජලය සමඟ ගැටෙන පුද්ගලයන්ට මෙය වැළඳීමේ අවදානම වැඩියි.

​අවදානම් කණ්ඩායම්:

විශේෂයෙන්ම ක්‍රීඩකයන්, ආරක්ෂක අංශ සාමාජිකයන් සහ කම්කරු ක්ෂේත්‍රයේ නියුතු අය අතර මෙය බහුලව දැකිය හැකියි.

​රෝග ලක්ෂණ සහ බෝවන ආකාරය

​ඔබටත් ඇඟිලි කරු කුණු වීමේ ලක්ෂණ තිබේද? 🤔
​මෙම රෝගයේ ප්‍රධානම ලක්ෂණය වන්නේ ඇඟිලි අතර ඇතිවන අධික කැසීමයි. බොහෝ විට මෙය කුඩා ඇඟිල්ල සහ ඊට යාබද ඇඟිල්ල අතරින් ආරම්භ වේ.

​වෙනත් රෝග ලක්ෂණ:

​සම පොතු යාම: ඇඟිලි අතර සම වේලී පොතු ලෙස ගැලවී යාම.

​සම පැලීම: සම ගැඹුරට පැලී වේදනාවක් හෝ දැවිල්ලක් ඇතිවීම.

​සුදු පැහැ වීම: තෙතමනය නිසා සම සුදු පැහැ වී මෘදු වීම.

​දිය බිබිලි: යටි පතුලේ හෝ ඇඟිලි මත කුඩා දිය බිබිලි ඇතිවීම.

​⚠️ වැදගත්: කැසීම ඇති වූ විට පාවහන් හෝ නියපොතු වලින් තදින් කසන්න එපා. එමගින් තුවාල වී බැක්ටීරියා ආසාදන (Secondary infections) ඇතිවිය හැකියි.

#දෙවන_කොටස තුලින් මෙය බෝවන ආකාර, ප්‍රතිකාර සහ ආරක්ෂිත පියවරයන් බලාපොරොත්තු වන්න. 👊

වෛද්‍ය ශානක කළුපහන.

​

🌸🌞 සුභ සිංහල හා හින්දු අලුත් අවුරුද්දක් වේවා!🌞🌸

ඔබටත් ඔබගේ ආදරණීය පවුලේ සියලුදෙනාටත්
සතුට, සෞභාග්‍යය, සෞඛ්‍යය සහ සාර්ථකත්වයෙන් පිරුණු
සුභ නව වසරක් වේවායි හදවතින්ම ප්‍රාර්ථනා කරමි 🙏✨

ඔබගේ සෞඛ්‍යය සහ සතුට සැමවිටම රැකෙන
සෞභාග්‍යමත් වසරක් වේවා! 🌿

– Dr. Shanaka Kalupahane

Better Life Health Care - හික්කඩුව

#තණකොළ_කපන යන්ත්‍රයක් කල හදියක්..

මේ අනතුර සිදුවෙන්නේ ගෙවත්තක පුද්ගලයෙකු තණකොල කපන අවස්තාවකදී එහි නිවෙස් හිමියා එම ස්ථානයේ රැදී සිටින අතරතුරදීය.

තියුණු යකඩ කැබැල්ලක් තණකොළ කපන යන්ත්‍රයේ තලයක ගැටී විසිවී අසල සිටි නිවෙස් හිමියාගේ කකුලක් පසාරු කරගෙන ගොස් තිබුනි.

නිර්වින්දනය කිරීමෙන් පසු යකඩ කැබැල්ල මා විසින් සීරුවෙන් ඉවත්කල අතර වාසනාවකට එහිදී රුධිර නාල හෝ අස්ථි වලට හානියක් සිදු නොවී තිබුණි.

සිතන්න.. මේ තියුණු යකඩ කැබැල්ල වේගයෙන් ඔහුගේ ඇසකට, බෙල්ලට හෝ පපුව පසාරු කරගෙන ගියානම් හෝ කුඩා දරුවෙකුගේ ගැටුණිනම් කුමක් සිදුවෙන්න තිබුණිද.

අනතුරු වෙන්නේ හිතන්නෙවත් නැති වෙලාවක..හැබැයි ඒ අනතුරු වලින් බොහෝමයක් වලක්වා ගන්න පුලුවන්.
මේ අනතුර වෙන්නෙත් අපරීක්ෂාකාරීකම නිසාමයි.

හැම දේකදිම කියන්නෙ කට කහනවට නෙමෙයි. තණකොළ කපන යන්ත්‍ර භාවිතයේදී සියලු ආරක්ෂක පියවරයන් එම සේවය සපයන්නා මෙන්ම සේවා ලාභීන්ද අනුගමනය කලයුතුය.

කණගාටුවට කරුණ නම් පොදු ප්‍රවාහන මාර්ග වල පවා (අධිවේගී මාර්ගවල හැර) කිසිදු ආරක්ෂක මෙවලම් හෝ ආරක්ෂක ආවරණ පවා නොමැතිව මෙවැනි තණකොල කපන අවස්තා බහුලව ඇති අතර එවැනි අවස්තා වලදී ඔබ මාර්ගයේ ගමන් ගන්නේ නම් ඉතාමත් සැලකිලිමත් විය යුතුය.

Dr. Shanaka Kalupahane

කුණකටුවා 🐍 සහ ගමේ වෙද මහත්තයා 👩‍⚕️

අද උදේ 9ට විතර මන් ලගට අවුරුදු 65 කාන්තාවක් ආවා. මේකයි කතාව..

මහත්තයෝ සතියකට කලින් දර ගොඩේ ඉදල කුණකටුවෙක් මගේ මේ ඇගිල්ල කෑවා.
අම්මෝ සතියකට කලින්.. කියල ලොකු හුස්මක් ඉබේම හෙලපු මම : කෝ බලන්න ඇගිල්ල පෙන්නන්න කියද්දි රෙදි කෑල්ලකින් ඔතන් හිටපු දකුණු අතේ මැද ඇගිල්ල මට පෙන්නුවේ ලොකු වේදනාවකින්..

ඒ ඇගිල්ල පිච්චුන අගුරු කෑල්ලක් වගේ තත්වෙටම ඇවිත් කියල ඔයාලටම පින්තූරය බැලුවම පෙනෙයි.
ඇයි සතියක් තිස්සේ ඔහොම තියාගෙන ගෙදරට වෙලා හිටියේ කියල මන් ඇහුවෙත් ටිකක් කේන්තියෙන්..ඒ ඇගිල්ල බේරගන්න බැරි තැනට ඇවිත් කියල අත්දැකීමෙන් දන්න නිසා.
මන් බෙහෙත් කරා මහත්තයෝ.. කියල හීනියට කියද්දි ඒ කොහෙන්ද කියල අහන්නත් කලින් ගමේ වෙද මහත්තයගෙන් මේ දවස් ටිකේම බෙහෙත් කරේ කියල බිම බලාගත්තා.

මෙච්චර ඇගිල්ල නරක් වෙනකන් වෙද මහත්තයගෙයි ඔයාගෙයි දෙන්නගෙම ඇස් පෙනුනෙ නැද්ද කියල මන් ඇහුවම කිව්වේ දැන් ඇගිල්ලේ විස අයින් වෙලා තියෙන්නේ ඒ නිසා ඇගිල්ල කලු වෙලා වේලීගෙන එන්නෙ කියල වෙද මහත්තයා කිව්වලු.
කතාව එච්චරයි..ඇගිල්ල හොදටම නරක් වෙලා තිබුන නිසා ඒ ඇගිල්ල කපලා ඉවත් කරා. දැන් ඒ කාන්තාවට ඇගිල්ලක් අහිමියි. කව්ද මේ අවාසනාවන්ත සිදුවීමේ වැරදි කරු කුණකටුවාද වෙද මහත්තයද ඒ කාන්තාවද ඇගිල්ල ඉවත් කරපු අපිද ?

මෙය සත්‍ය සිදුවීමක් වන අතර පාරම්පරික දක්ෂ හෙළ වෛද්‍යවරුන්ට මඩ ගැසීමක් නොවන බව කරුණාවෙන් සලකන්න.

නමුත් සර්ප දෂ්ඨනයකදී රෝහලකට යෑම ජීවිතයේ ගන්නා වැදගත්ම තීරණයක් බව මතක තබා ගත යුතුය.

වෛද්‍ය ශානක කලුපහන