SALON D LA

බටහිර වෛද්‍ය විද්‍යාවට (Western Medicine) පමණක් හැමතැනම ඉහළ පිළිගැනීමක් ලැබෙන සමාජයක, අපේ සාම්ප්‍රදායික දේශීය වෛද්‍ය ක්‍රමයට ජාත්‍යන්තර මට්ටමේ විද්‍යාත්මක වටිනාකමක් එකතු කරන්නට සමත් වූ සුවිශේෂී තරුණියක් ගැනයි මේ කතාව. ඇය, ලෝක ප්‍රකට එංගලන්තයේ ඔක්ස්ෆර්ඩ් විශ්වවිද්‍යාලයේ (University of Oxford) පශ්චාත් උපාධියක් සඳහා තේරී පත්වුණු ලංකාවේ ප්‍රථම සහ එකම ආයුර්වේද වෛද්‍යවරිය වන දනුෂ්කා ග්‍රේරෝ.

කෑගල්ල තෝලංගමුව ඩඩ්ලි සේනානායක මධ්‍ය Maha විද්‍යාලයෙන් මූලික අධ්‍යාපනය ලැබූ දනුෂ්කා, පාසල් කාලයේදී නර්තනය, සංගීතය වගේම තූර්ය වාදක කණ්ඩායම්වල පවා දස්කම් පෑ සර්වකාලීන දක්ෂතා පිරුණු ශිෂ්‍යාවක්. කුඩා කාලයේදී ඇය තුළ තිබුණේ බටහිර වෛද්‍යවරියක් වීමේ හීනයක් වුණත්, උසස් පෙළ ඉහළින්ම සමත් වීමෙන් පසුව ඇය තෝරාගන්නේ කොළඹ විශ්වවිද්‍යාලයේ ආයුර්වේද වෛද්‍ය පීඨයයි. වසර පහක විශ්වවිද්‍යාල අධ්‍යාපනය දෙවැනි පෙළ ඉහළ සාමාර්ථයක් (Second Class Upper) සහිතව නිමා කළ ඇය, බොරැල්ල, මීගොඩ සහ නාවින්න වැනි ප්‍රධාන ආයුර්වේද රෝහල්වලින් තමන්ගේ සායනික පුහුණුව සාර්ථකව අවසන් කළා.

බොහෝ දෙනෙක් විශ්වවිද්‍යාලයෙන් අවුට් වුණාට පස්සේ රජයේ පත්වීම් ලැබෙනතුරු බලා සිටියත්, දනුෂ්කා ඒ සාම්ප්‍රදායික මඟ ගියේ නැහැ. ඇය තමන්ගේම කියලා පෞද්ගලික සායනයක් ආරම්භ කරමින් රෝගීන්ට ප්‍රතිකාර කරන්න පටන්ගත්තා. එතැනින් නොනැවතී, වසර 10කට අධික කාලයක් පුරා ඇය කළ සාර්ථක පර්යේෂණ සහ ප්‍රතිකාර ක්‍රමවේද හරහා බටහිර වෛද්‍ය විද්‍යාවෙන් පවා සුව කරන්න බැහැයි කියපු රෝගීන් රැසක් සුවපත් කරන්නට ඇයට හැකි වුණා.

ඇගේ ජීවිතයේ ලොකුම හැරවුම් ලක්ෂය සනිටුහන් වෙන්නේ ඔක්ස්ෆර්ඩ් විශ්වවිද්‍යාලයේ සාක්ෂි පදනම් කරගත් වෛද්‍ය විද්‍යාව (Evidence-Based Medicine) හැදෑරීමට ඇයට වරම් ලැබීමත් සමඟයි. සාම්ප්‍රදායික ආයුර්වේදය හුදු "විශ්වාසයන්" මත පමණක් රඳවා නොතබා, නවීන විද්‍යාත්මක සාක්ෂි සහ පර්යේෂණ ඔස්සේ එහි සුව කිරීමේ සැබෑ බලය මුළු ලෝකයටම ඔප්පු කර පෙන්වීම ඇගේ එකම අරමුණයි.

අපේ රටේ දේශීය උරුමයක් බඳු හෙළ වෙදකම ජාත්‍යන්තර තලයට ඔසවා තබන්නට වෙහෙසෙන වෛද්‍ය දනුෂ්කා ග්‍රේරෝගේ මේ නිර්භීත සහ අභිමානවත් ගමනට අපගේ උණුසුම් සුබ පැතුම්!