777 Star Shop

👨‍🏫 အမျိုးသားဟိုမုန်းနည်းခြင်းရောဂါ (Hypogonadism) သည် အမျိုးသားထုကြီးအားခြိမ်းခြောက်လျှက်ရှိပြီး ၂.၁ ရာခိုင်နှုန်းမှ ၁၂.၈ ရာခိုင်နှုန်းအထိဖြစ်ပွားသည်ကိုတွေရှိရပါသည်။ သက်ကြီးအမျိုးသားများ၊အဝလွန်ရောဂါရှိသူများနှင့် ဆီးချိုရောဂါရှိသောအမျိုးသားတွင် ပို၍အဖြစ်များပါသည်။

အမျိုးသားဟိုမုန်း(Testosterone)

အမျိုးသားဟိုမုန်းဆိုသည်မှာ အမျိုးသားများတွင် မရှိမဖြစ်လိုအပ်သောဟိုမုန်းဖြစ်ပြီး တနေ့လျှင် ပျှမ်းမျှ ၇၀၀၀ မိုက်ခရိုဂရမ်ခန့်ထွက်ရှိပါသည်။ မနက်၈နာရီခန့်တွင်အများဆုံးထွက်ရှိပြီး ည၈နာရီခန့်တွင်အနည်းဆုံးထွက်ရှိပါသည်။ အမျိုးသားတစ်ဦးသည် အသက် ၃၀ ကျော်လာပါက အမျိုးသားဟိုမုန်းသည် ၁ နှစ်လျှင် ၁ ရာခိုင်နှုန်းခန့်လျော့ကျနိုင်ပါသည်။ အမျိုးသားဟိုမုန်း၏ လုပ်ငန်းတာဝန်များမှာ မျိုးဆက်ပွားကျန်းမာရေးတွင် အဓိကလိုအပ်သော ကာမစိတ်ကို နိုးကြားစေခြင်း၊ အရိုးများသန်မာစေခြင်း၊ ကြွက်သားများအား ကောင်းစေခြင်းနှင့် သွေးအားကောင်းစေခြင်းတို့ပါဝင်ပါသည်။

ရောဂါလက္ခဏာများ

အမျိုးသားဟိုမုန်းနည်းခြင်း၏ ရောဂါလက္ခဏာများမှာ ပန်းသေပန်းညှိုးခြင်း၊ ကာမစိတ်လျော့နည်းခြင်း၊ မောပန်းလွယ်ခြင်း၊ မကြာခဏသတိမေ့တတ်ခြင်း၊ စိတ်ကျရောဂါခံစားရခြင်း၊ အရိုးပွရောဂါဖြစ်ခြင်း၊ သွေးအားနည်းခြင်းနှင့် ကြွက်သားအားနည်းခြင်းတို့ဖြစ်ပါသည်။

ရောဂါအဖြစ်သတ်မှတ်ခြင်း

အမျိုးသားဟိုမုန်းနည်းခြင်းရောဂါအဖြစ်သတ်မှတ်နိုင်ရန်အတွက် အချက်နှစ်ချက်နှင့်ပြည့်စုံရန်လိုအပ်ပါသည်။ ဌင်းတို့မှာ သက်ကြီးအမျိုးသားများတွင် အမျိုးသားဟိုမုန်းနည်းခြင်းနှင့်ပါသတ်သောစစ်တမ်းလွာအရ အချက် ၁၀ ချက်တွင် ၃ ချက်နှင့်အထက်ရှိနေခြင်း၊ သွေးဖောက်စစ်ဆေးရာတွင် အမျိုးသားဟိုမုန်း ၁၂ နာနိုမိုးပါလီတာအောက်ရှိနေခြင်းတို့ဖြစ်ပါသည်။

ရောဂါကုသခြင်း
အမျိုးသားဟိုမုန်းနည်းခြင်းကိုကုသရာတွင် ရောဂါဖြစ်စေသော အကြောင်းရင်းဇစ်မြစ်ကိုဦးစွာရှာဖွေပြီးမှသာ ကုသသင့်ပါသည်။ ဆေးမြီးတိုများဖြင့်ကုသခြင်း၊အမျိုးသားဟိုမုန်းပမာဏကိုမတိုင်းတာပဲဆေးထိုးခြင်းများကိုရှောင်ကြဉ်သင့်ပါသည်။ ဆီးကျိတ်ကင်ဆာဝေဒနာရှင်များ၊ ရင်သားကင်ဆာရှိသူများ၊ ဆီးကျိတ်ကြီးသူများနှင့်ကလေးယူရန်ဆန္ဓရှိသူများတွင် အမျိုးသားဟိုမုန်းဖြင့်ကုသခြင်းကို ရှောင်ကြဉ်သင့်ပါသည်။

အမျိုးသားဟိုမုန်း(Testosterone)ဆေးများကို ထိုးဆေး၊သောက်ဆေး၊လိမ်းဆေး၊အရေပြားအောက်တွင်ထည့်သောဆေး၊လျှာအောက်တွင်ငုံသောဆေးဟူ၍ ပုံစံမျိုးစုံတွေ့ရှိရပါသည်။ ၎င်းတို့အနက်မှထိုးဆေးမှာအထိရောက်ဆုံးဖြစ်ပါသည်။ ထိုးဆေးတွင် ၁ လ ၁ ခါထိုးရသောဆေးနှင့် ၃ လ ၁ခါထိုးရသောဆေးဟူ၍နှစ်မျိုးရှိပါသည်။

အမျိုးသားဟိုမုန်းဆေးသည်နှစ်ဖက်ချွန်ဓားနှင့်အလားသဏ္ဍန်တူပေသည်။ ၎င်းသည် သုံးတတ်လျှင်ဆေးမသုံးတတ်လျှင်ဘေးဖြစ်တတ်သော ဆေးမျိုးဖြစ်ပါသည်။ ထို့ကြောင့်အမျိုးသားဟိုမုန်းဆေးမပေးမီ ဆီးကျိတ်ကင်ဆာရှိမရှိ၊ဆီးကျိတ်ကြီးမကြီး၊သွေးနီဥများမများတို့ကို ဦးစွာစစ်ဆေးရန်လိုအပ်ပါသည်။ ထို့ပြင်မလိုအပ်ပဲအမျိုးသားဟိုမုန်းဆေးထိုးပါက ဟိုမုန်းများကိုထိန်းချုပ်သောစနစ်ပျက်စီးသွားပြီး ရာသက်ပန်ဟိုမုန်းဆေးထိုးရသောဘဝသို့ရောက်ရှိသွားတတ်ပါသည်။
အမျိုးသားဟိုမုန်းဆေးသည် ရောဂါအမျိုးစားပေါ်မူတည်၍အာနိသင်ပြချိန်ကွာခြားပါသည်။ ကြွက်သားများသန်မာရန်အတွက် ၃ လမှ ၄ လခန့်အချိန်ကြာတတ်ပါသည်။ အရိုးပွရောဂါများသက်သာရန်အတွက် ၆ လခန့်လိုအပ်ပါသည်။ စတ်ကျရောဂါခံစားရသူများအတွက် ၃ ပါတ်မှ ၆ ပါတ်ခန့်အထိစောင့်ရန်လိုအပ်ပါသည်။ ပန်းညိုှးခြင်းဝေဒနာခံစားရသော သူများတွင် တစ်ခါတစ်ရံ ၁ နှစ်ခန့်အထိ အချိန်ယူကုသရန်လိုအပ်ပါသည်။
အမျိုးသားဟိုမုန်းနည်းခြင်းရောဂါသည် အမျိုးသားထုကြီးကိုများစွာဒုက္ခပေးလျှက်ရှိပြီးကုသရာတွင်လည်း လွယ်မယောင်နှင်ခက်၊တိမ်မယောင်နှင့်နက်သောရောဂါတစ်ခုဖြစ်ပါသည်။ထို့ပြင်ကျွန်ုပ်တို့၏ယဉ်ကျေးမှုဓလေ့ထုံးစံများအရ အမျိုးသားအများစုမှာ မိမိ၏ရောဂါကိုဖွင့်ဟပြောကြားရန်ခက်ခဲသည်ကိုတွေ့ရှိရပါသည်။ထိုအခါ ထိရောက်သောကုသမှုများမရပဲ ဆေး၏ဘေးထွက်ဆိုကျိုးများကိုသာခံစားရသည်ကိုတွေ့ရှိရပါသည်။ ထိုကြောင့် နားလည်တတ်ကျွမ်းသောဆရာဝန်များနှင့် ကုသရန်လိုအပ်လှပေသည်။ ။


ဒေါက်တာသိန်းစိုးထွန်း
အထွေထွေအထူးကုသမားတော်