PCDA Lakki Marwat

*منشیات سے پاک پاکستان: ایک قومی عزم اور ہماری اخلاقی ذمہ داری*
26 جون، منشیات کے استعمال اور غیر قانونی اسمگلنگ کے خلاف عالمی دن کے موقع پر، ہمیں یہ عہد کرنا ہوگا کہ ہم ایک ایسے معاشرے کی تشکیل کریں گے جہاں منشیات کا کوئی وجود نہ ہو۔ منشیات صرف ایک نشہ نہیں، بلکہ یہ ایک خاموش قاتل ہے جو ہماری نوجوان نسل، ہماری معیشت اور ہمارے مستقبل کو تباہ کر رہا ہے۔
منشیات کے تباہ کن اثرات: زندگی کا اندھیرا
منشیات کا استعمال انسان کو جسمانی، ذہنی اور معاشرتی طور پر مکمل طور پر مفلوج کر دیتا ہے۔ اس کے اثرات صرف ایک فرد تک محدود نہیں رہتے، بلکہ پورا خاندان اس کی لپیٹ میں آ جاتا ہے۔
صحت پر اثرات: منشیات کا استعمال پھیپھڑوں، جگر، دل اور گردوں کی تباہی کا باعث بنتا ہے۔ یہ انسانی اعصاب کو کمزور کر کے ذہنی امراض، ڈپریشن، اور خودکشی کے رجحان کو جنم دیتا ہے۔
خاندانی تباہی: نشے کا عادی شخص نہ صرف اپنے وسائل ضائع کرتا ہے بلکہ اپنے خاندان کے لیے معاشی بوجھ اور جذباتی صدمے کا سبب بنتا ہے۔ یہ رشتوں میں دراڑ اور گھریلو تشدد کی سب سے بڑی وجہ ہے۔
معاشرتی بگاڑ: منشیات کی لت انسان کو مجرمانہ سرگرمیوں کی طرف دھکیلتی ہے۔ چوری، ڈکیتی، اور دیگر اخلاقی جرائم اکثر اسی لعنت کے نتیجے میں جنم لیتے ہیں۔
قومی نقصان: ایک نشے کا عادی نوجوان قوم کے لیے اثاثہ بننے کے بجائے ایک بوجھ بن جاتا ہے۔ یہ ہماری ورک فورس، تخلیقی صلاحیتوں اور مستقبل کے معماروں کو دیمک کی طرح کھا رہا ہے۔
ہماری اخلاقی اور قومی ذمہ داریاں
منشیات کو جڑ سے اکھاڑ پھینکنا صرف حکومت یا قانون نافذ کرنے والے اداروں کا کام نہیں، بلکہ یہ ہم سب کا اجتماعی فرض ہے۔ بطور شہری ہماری ذمہ داریاں درج ذیل ہیں:
آگاہی مہم کا حصہ بنیں: اپنے گھر، محلے، اور تعلیمی اداروں میں منشیات کے نقصانات کے بارے میں بات کریں۔ خاموشی اس مسئلے کو مزید بڑھاوا دیتی ہے۔
نوجوانوں کی کونسلنگ: اپنے بچوں اور نوجوانوں سے دوستی کا رشتہ استوار کریں۔ ان کی سرگرمیوں پر نظر رکھیں اور انہیں مثبت مشغلوں (کھیل، مطالعہ، سماجی کام) کی طرف راغب کریں۔
مشکوک سرگرمیوں کی اطلاع: اگر آپ اپنے اردگرد کہیں منشیات کی فروخت یا استعمال دیکھیں تو اسے چھپائیں مت۔ قانون نافذ کرنے والے اداروں کو مطلع کریں تاکہ اس ناسور کو پھیلنے سے روکا جا سکے۔
نشے کے عادی افراد سے ہمدردی: نشے کے عادی شخص کو حقارت کی نظر سے دیکھنے کے بجائے اسے ایک مریض سمجھیں۔ اسے بحالی مراکز (Rehabilitation Centers) تک پہنچانے میں مدد کریں تاکہ وہ دوبارہ نارمل زندگی کی طرف لوٹ سکے۔
خود احتسابی: اپنی ذات سے شروعات کریں۔ ایک نظم و ضبط والی زندگی گزاریں اور کسی بھی غیر صحت مند رویے کو پنپنے نہ دیں۔
ہمارا عزم: منشیات کو ناں، زندگی کو ہاں
آئیے آج ہم مروت قوم یہ تہیہ کریں کہ ہم اپنی آنے والی نسلوں کو ایک محفوظ اور منشیات سے پاک ماحول فراہم کریں گے۔ ہمارا عزم ہی پاکستان کی ترقی کی ضمانت ہے۔
"منشیات کی لعنت سے پاک معاشرہ، خوشحال پاکستان کی بنیاد ہے۔"
آئیے آج سے ہی اس عزم کا اعادہ کریں:
ہم منشیات کے خلاف آواز اٹھائیں گے۔
ہم اپنے پیاروں کو اس زہر سے بچائیں گے۔
ہم لکی مروت کو منشیات سے پاک کریں گے۔
ہم ایک صحت مند اور تابناک پاکستان کے لیے اپنی پوری توانائی صرف کریں گے۔
منشیات کو ناں کہیں، اپنی قیمتی زندگی اور روشن مستقبل کو ہاں کہیں

منجانب:
*پاکستان کیمسٹ اینڈ ڈرگسٹ ایسوسی ایشن لکی مروت*

پیزو
ڈرگ انسپکٹر ساجد نور مروت پیزو میں میڈیکل سٹورز میں میڈیسن کی انسپکشن کرتے ہوئے۔ رحمت اللہ مروت اور بشیر خان مروت صدر آل ڈسٹرکٹ ڈرگسٹ اینڈ کیمسٹ ایسوسی ایشن بھی ساتھ تھے۔

صوبائی حکومت خیبر پختونخوا کے احکامات اور ڈپٹی کمشنر لکی مروت جناب حمید اللہ خان کی ہدایات کی روشنی میں اسسٹنٹ کمشنر (ریونیو) محمد اسد خان نے ڈرگ انسپکٹر ساجد نور کے ہمراہ آج مورخہ 15/6/2026 کو لاری اڈہ لکی سٹی میں مختلف میڈیکل اسٹورز کا اچانک معائنہ کیا۔

دورانِ معائنہ میڈیکل اسٹورز کے لائسنس، ادویات کا معیار، ایکسپائری ڈیٹس، ریکارڈ کی دستیابی، ادویات کی مناسب اسٹوریج اور ڈرگ قوانین پر عملدرآمد کا تفصیلی جائزہ لیا گیا۔ اس موقع پر فارماسسٹ/اہل عملے کی موجودگی کو بھی چیک کیا گیا۔

مروت کیمسٹ اینڈ ڈرگسٹ ایسوسی ایشن، تینوں تحصیلیں
لکی نورنگ غزنی خیل اہم ہدایات برائے کیمسٹ حضرات
اسلام علیکم ورحمۃ اللہ وبرکاتہ
محترم کیمسٹ حضرات!
جیسا کہ آپ سب بخوبی جانتے ہیں کہ ادویات کا کاروبار دن بہ دن مزید حساس اور ضابطہ کار کے تابع ہوتا جا رہا ہے۔ اس سلسلے میں آپ کی خدمت میں چند اہم گزارشات پیش کی جاتی ہیں، جن پر عمل درآمد نہ صرف قانونی تقاضا ہے بلکہ ہمارے کاروبار کے تحفظ اور بہتری کے لیے بھی ضروری ہے۔
تمام ادویات صرف مستند اور رجسٹرڈ ڈسٹریبیوٹرز سے خریدیں اور ہر خریداری کے ساتھ وارنٹی بل لازمی حاصل کریں۔ بغیر وارنٹی بل کے ادویات ہرگز نہ رکھیں۔
روزانہ موصول ہونے والے تمام بلوں کو باقاعدگی سے محفوظ کریں۔ ہر بل پر تاریخ اور مہینہ درج کرکے مناسب ریکارڈ کے ساتھ گودام یا فائل میں محفوظ رکھیں تاکہ ضرورت پڑنے پر فوری پیش کیے جا سکیں۔
غیر رجسٹرڈ، بغیر وارنٹی، اسمگل شدہ یا انڈین ادویات اپنے میڈیکل سٹور یا فارمیسی میں ہرگز نہ رکھیں۔
ڈرگ سیل لائسنس کو دکان میں نمایاں اور واضح جگہ پر آویزاں رکھیں تاکہ معائنہ کے دوران آسانی سے دیکھا جا سکے۔
ایکسپائر شدہ ادویات، شارٹ ایکسپائری ادویات اور نارکوٹکس کے لیے الگ اور مخصوص خانے یا جگہ مختص کریں، تاکہ قانونی تقاضے پورے ہو سکیں۔
اگر حکومت کی جانب سے مقرر کردہ کوئی افسر معائنہ کے لیے آئے تو اس کے ساتھ مکمل تعاون کریں اور خوش اخلاقی کا مظاہرہ کریں۔ بحیثیت مسلمان اور خدائی خدمت گار تاجر، اچھا رویہ اختیار کرنا ہماری ذمہ داری ہے۔
اگر خدانخواستہ آپ کی دکان سے کوئی ایسی چیز برآمد ہو جس کی ذمہ داری آپ پر عائد ہوتی ہو تو متعلقہ افسر کے سوالات کا درست اور سچا جواب دیں، خواہ وہ تحریری صورت میں ہوں یا زبانی۔
اگر کسی غلطی کی بنیاد پر کیس بن جائے تو قانون کے دائرے میں رہتے ہوئے مناسب جواب دیں اور آئندہ ایسی غلطی سے بچنے کی یقین دہانی کرائیں۔
قانون کو اپنے ہاتھ میں لینے یا کسی بھی قسم کی خلاف ورزی سے اجتناب کریں اور ہمیشہ قانونی طریقہ کار کو اختیار کریں۔
اپنے کاروبار کو حلال، شفاف اور اصولوں کے مطابق چلانے کی کوشش کریں۔ حکومت اور ادویات ساز کمپنیوں کی جانب سے مقرر کردہ منافع آپ کے لیے جائز اور کافی ہے، لہٰذا غیر ضروری منافع خوری سے گریز کریں اور عوام کو مناسب نرخوں پر ادویات فراہم کریں۔
اللہ تعالیٰ ہم سب کو دیانت داری، قانون کی پابندی اور رزقِ حلال کے ساتھ اپنا کاروبار چلانے کی توفیق عطا فرمائے۔
وسلام
مروت کیمسٹ اینڈ ڈرگسٹ ایسوسی ایشن. لکی مروت

PCDA ضلع لکی مروت صدر حاجی محمد بشیر خان صاحب کے زیر اہتمام آج ایک اہم جنرل میٹنگ منعقد ہوئی ۔
میٹنگ میں ضلع بھر کے میڈیکل اسٹور مالکان اور فارمیسی سے وابستہ افراد نے شرکت کی۔ اجلاس میں یکم مئی (یوم مزدور) کے حوالے سے مزدوروں کے حقوق اور ان کی اہمیت پر گفتگو کی گئی۔
اس کے ساتھ نشہ آور ادویات کے خلاف مشترکہ اقدامات پر زور دیا گیا اور اس ناسور کے خاتمے کے لیے باہمی تعاون پر اتفاق کیا گیا۔
میٹنگ کے دوران تمام اسٹور مالکان نے ایک دوسرے سے ملاقات کی، خوشگوار ماحول میں فارمیسی سے متعلق مسائل، بہتری اور عوام کو بہتر طبی سہولیات فراہم کرنے پر تبادلہ خیال کیا گیا۔

پی سی ڈی اے (PCDA) لکی مروت صدر حاجی محمد بشیر خان صاحب کی جانب سے یومِ مزدور (یکم مئی) پر خصوصی بیان
یومِ مزدور، جو ہر سال Labour Day کے طور پر یکم مئی کو منایا جاتا ہے، محنت کش طبقے کی عظمت، قربانیوں اور حقوق کی یاد دہانی کا دن ہے۔ اس موقع پر پی سی ڈی اے لکی مروت تمام مزدور بھائیوں کو خراجِ تحسین پیش کرتی ہے، خصوصاً وہ افراد جو صحت کے شعبے سے وابستہ ہیں۔
ہماری تنظیم کا تعلق میڈیکل اسٹورز اور ہیلتھ سروسز سے ہے، اس لیے ہم بخوبی جانتے ہیں کہ ہسپتالوں، کلینکس، پرائیویٹ ہیلتھ سنٹرز اور میڈیکل اسٹورز میں کام کرنے والے مزدور، سٹاف، کمپاؤنڈرز، اسسٹنٹس اور دیگر محنت کش کس قدر اہم کردار ادا کرتے ہیں۔ یہ وہ لوگ ہیں جو دن رات عوام کی خدمت میں مصروف رہتے ہیں اور مریضوں کی زندگی بچانے میں خاموش مگر بنیادی کردار ادا کرتے ہیں۔
پی سی ڈی اے لکی مروت اس عزم کا اظہار کرتی ہے کہ:
تمام میڈیکل اسٹورز اور ہیلتھ سینٹرز میں کام کرنے والے مزدوروں کے حقوق کا خیال رکھا جائے گا
ان کے ساتھ عزت، انصاف اور تعاون کا رویہ اپنایا جائے گا
مشکل وقت میں ان کی مدد اور سپورٹ کو یقینی بنایا جائے گا
ہم تمام ڈاکٹرز، میڈیکل اسٹور مالکان اور ہیلتھ پروفیشنلز سے اپیل کرتے ہیں کہ وہ اپنے ساتھ کام کرنے والے مزدوروں کے ساتھ بھرپور تعاون کریں، ان کی فلاح و بہبود کو یقینی بنائیں اور انہیں ایک محفوظ اور باعزت ماحول فراہم کریں۔
آخر میں، پی سی ڈی اے یہ پیغام دینا چاہتی ہے کہ ایک مضبوط اور صحت مند معاشرہ اسی وقت ممکن ہے جب ہم اپنے محنت کش طبقے کو عزت دیں اور ان کے حقوق کی حفاظت کریں۔
پی سی ڈی اے لکی مروت
سیکرٹری اطلاعات اکرام اللّٰہ

لکی مروت میں صحت کی سہولیات میں ایک خوش آئند اضافہ اُس وقت دیکھنے میں آیا جب محمد سائم میڈیکل اسٹور کا باقاعدہ افتتاح کیا گیا۔ یہ افتتاح ایک سادہ مگر باوقار تقریب میں عمل میں آیا، جس میں پی سی ڈی اے لکی مروت کے صدر حاجی محمد بشیر خان صاحب اور ڈرگ انسپکٹر ساجد نور صاحب نے خصوصی شرکت کی۔
یہ صرف ایک نئے کاروبار کا آغاز نہیں بلکہ عوام کے لیے صحت کے میدان میں ایک اہم قدم ہے۔ محمد سائم میڈیکل اسٹور کے قیام سے علاقے کے لوگوں کو بروقت اور معیاری ادویات کی فراہمی ممکن ہو سکے گی، جس سے مریضوں کو دور دراز جانے کی زحمت سے بھی نجات ملے گی۔
مقامی افراد کے لیے یہ میڈیکل اسٹور ایک بڑی سہولت ثابت ہوگا، جہاں نہ صرف ضروری ادویات دستیاب ہوں گی بلکہ رہنمائی بھی فراہم کی جائے گی۔ اس اقدام سے صحت کے شعبے میں بہتری آئے گی اور عوام کو بہتر طبی سہولیات میسر ہوں گی۔
امید کی جاتی ہے کہ محمد سائم میڈیکل اسٹور مستقبل میں بھی عوام کی خدمت کے جذبے کے ساتھ اپنی خدمات جاری رکھے گا اور علاقے میں صحت کے معیار کو مزید بہتر بنانے میں اپنا کردار ادا کرے گا۔
سیکرٹری اطلاعات اکرام اللّٰہ

مذمتی اعلامیہ: پاکستان کیمسٹ اینڈ ڈرگسٹ ایسوسی ایشن (PCDA) لکی مروت
پاکستان کیمسٹ اینڈ ڈرگسٹ ایسوسی ایشن لکی مروت طفیل میڈیسن کمپنی کے سیلز مین سے بندوق کے زور پر رقم چھیننے کی لرزہ خیز واردات کی پرزور مذمت کرتی ہے۔ دن دیہاڑے اسلحے کے زور پر محنت کشوں کو لوٹنا نہ صرف قانون نافذ کرنے والے اداروں کی کارکردگی پر سوالیہ نشان ہے بلکہ یہ تاجر برادری کے اعتماد کو ٹھیس پہنچانے کے مترادف ہے۔

پاکستان کیمسٹ اینڈ ڈرگسٹ ایسوسی ایشن لکی مروت ضلعی انتظامیہ سے مطالبہ کرتی ہیں کہ اس واقعے کی فی الفور تحقیقات شروع کی جائیں اور سی سی ٹی وی (CCTV) فوٹیج و دیگر شواہد کی مدد سے ملزمان کو جلد از جلد قانون کے کٹہرے میں لایا جائے۔
حکومت اگر میڈیکل اسٹورز اور ڈسٹریبیوٹرز کو تحفظ فراہم نہیں کرتی تو پاکستان کیمسٹ اینڈ ڈرگسٹ ایسوسی ایشن لکی مروت احتجاجی طور پر ہڑتال کرنے پر مجبور ہوگی۔

پی سی ڈی اے لکی مروت کے صدر حاجی محمد بشیر خان صاحب نے غزنی خیل اور شھباز خیل میں آج نشہ آور ادویات کے بائیکاٹ کے حوالے سے ایک اہم مہم چلائی۔ اس مہم میں ڈاکٹر احسان اللہ اور ڈاکٹر مطیع اللہ نے بھرپور کردار ادا کیا اور عوام میں آگاہی پیدا کرنے کے لیے مؤثر کوششیں کیں۔
مہم کے اختتام پر انہوں نے شرکاء کے اعزاز میں دعوتِ طعام کا بھی اہتمام کیا،
ہم ڈاکٹر مطیع اللہ اور ڈاکٹر احسان اللہ کے تہہ دل سے شکر گزار ہیں کہ انہوں نے ہمارے ساتھ اس مہم میں بھرپور شرکت کی، ہمارے ساتھ مل کر کمپین چلائی اور ہر ممکن تعاون فراہم کیا۔ ان کی محنت اور کوششیں قابلِ تحسین ہیں۔ مزید برآں، انہوں نے شرکاء کے لیے کھانے پینے کا بہترین انتظام بھی کیا، جس پر ہم ان کے انتہائی ممنونIkrAm ullah Marwat۔

"سالار انٹرپرائز میڈیسن بنوں کے سیلز مین ریاض خان کا آج منجیوالے چوک کے قریب روڈ ایکسیڈنٹ ہوا۔ جیسے ہی یہ خبر Haji Muhammad Bashir Khan صاحب (صدر PCDA Lakki Marwat) کو موصول ہوئی، وہ فوری طور پر ہسپتال پہنچ گئے اور ہر ممکن تعاون فراہم کیا۔"